Magalada Nairobi ee Caasimadda dalka Kenya ayaa la filayaa in Maanta oo Talaado ah ay ku kulmaan Wakiilo ka kala socda Dowladda Federaalka Soomaaliya iyo Maamulka Soomaaliland,kulamadaas oo horudhac u ah bilaawga wadahadallada Soomaaliya iyo Soomaaliland.
Kulamada ayaa waxaa soo qaban-qaabisay xarunta xallinta khilaafaadka ee Centre for Humanitarian Dialogue (HD), iyada oo lagu doonayo in la wadahadal siiyo Madaxda Dowladda Federaalka iyo Soomaaliland oo aaminsan Soomaaliya inteeda kale inay ka go’day.
Wakiilka Soomaaliland ee dalka Kenya Baashe Cawil Cumar ayaa sheegay in shirkaasi uu noqon doono mid ahmiyad weyn u leh Soomaaliland,isla markaana Soomaaliland ay diyaar u tahay in ay mar walba wadahadal la furto dowladda Federaalka Soomaaliya.
Madaxweynaha Soomaaliland Muuse Biixi Cabdi ayuu sheegay in uu wafdi u diray Magalada Nairobi si ay uga qeyb galaan wadahadallada horudhaca ah oo ay la yeelanayaan Xubnaha ka socda Dowladda Federaalka Soomaaliya.
Dowladda Soomaaliya wadahadalladaas waxaa ku meteli doonaan wafdi uu hoggaaminayo Agaasimaha Madaxtooyada Soomaaliya Dr Nuur Diiriye( Fursade) & Kaaliyaha Agaasimaha Madaxtooyada Cabdi Sataar Geelle.
Dhinaca Soomaliland ayaa waxaa kulamadaas ka qeyb geli doona Wasiirka Arrimaha Dibadda Soomaaliland Yaasiin Maxamuud Faratoon, Maareeyaha Hay’adda Duulista Hawada Maxamed Cabdi Rodol & Wakiilka Soomaaliland ee dalka Kenya Baashe Cawil Cumar,waxaana sidoo kale Goobjoog ka noqon doona wafdi ka socd Beesha Caalamka.
