Al-shabaab oo duqeymo culus xalay lagula eegtay xadka gobolada Galgaduud iyo Shabeellaha Dhexe

Wararka naga soo gaaraya xadka gobolada Galgaduud iyo Shabeellaha Dhexe ayaa  sheegaya in Xalay duqeymo culus lagula eegtay xadka labadaan gobol xubno ka tirsan kooxda Al-shabaab. 

Duqeymahan oo ay fuliyeen diyaaradaha dagaalka ayaa si gaar ah uga dhacay aagga deegaanka Hareera Culusow oo ah deegaan ay gacanta ku hayso maleeshiyada Al-shabaab.

Ilo wareedyo ku sugan deegaanka ayaa warbaahinta u sheegay in duqeyntan lagu garaacay saldhigyo  Al-Shabaab ku leeyihiin halkaas oo ay ku sugnaayeen maleeshiyaad iyo horjoogayaal sar sare oo ka tirsan kooxda.

Wararku waxay intaasi ku darayaan in  weerarka lagu dilay xubno badan oo ka tirsanaa Al-Shabaab oo isku uruursanayeen halkaasi, hase ahaatee ma jirto war rasmi ah oo xaqiijinaya inta uu dhan yahay khasaarajlha rasmiga ah ee kooxda kasoo gaaray duqeynta.

Jugta duqeynta ka dhacday xadka gobolada Galgaduud iyo Shabeellaha Dhexe ayaa si weyn loog maqlaayay xalay deegaano ka fog fog aaga duqeymaha lagula eegtay Maleeshiyaadka Al-shabaab. 

Ma jirto wali wax war ah oo kasoo baxay dhanka dowladda Fedaraalka Soomaaliya iyo saaxiibada caalamiga ah ee ka taageerada dowladda oo ku aadan khasaaraha ka dhashay duqeymaha xalay lala beegsaday goobta ay isku aruursanayeen kooxda Al-shabaab.