Dowladda Soomaaliya ayaa warqadaha aqoonsiga ka aqbashay ergayga gaar ah ee Jaamacadda Carabta ee Soomaaliya.
Danjirahan oo lagu magacaabo Amb. Hamoud Samaran Al Jowhary Al Huwaidi ayaa waxaa warqadaha aqoonsiga ka gudoomay Wasiiru dowlaha Arrimaha Dibadda iyo Iskaashiga Caalamiga ee dowladda Soomaaliya Mr. Abdulkadir Ahmed-Kheir Abdi
Qaabilaadda Ergeyga cusub oo ay goob joog ka ahaayeen Xoghayaha joogtada Wasaaradda, Agaasimayaasha habmaamuuska iyo Carabta ayaa lagu soo dhoweeyay Danjire Xamuud Samaraan Al jowhari Al Xuweydhi oo badalay Ambassador Mohamed Abdalla Idris.
Wasiiru dowlaha Arrimaha Dibadda iyo Iskaashiga Caalamiga Mudane, Cabdulqaadir Axmed-Kheyr Cabdi ayaa u rajeeyay ergeyga cusub ee Jaamacadda Carabta guul la taaban karo inuu ka gaaro howlaha loo igmaday, sidoo kalana horseed u noqdo in dhammaan dalalka carbeed ay dib uga furtaan Safaaradahooda caasimadda Muqdisho.
Soomaaliya ayaa xubin ka noqotay Ururka Jaamacadda Carabta February 14, 1974 kadib afar toban sano markii dalka uu gobonnimada qaatay.
