Dowladda Kenya ayaa dib u bilaawday darbiga khilaafka dhaliyay ay ka dhiseyso Xaduudka labada dal gaar ahaan dhanka Magaalada Balad Xaawo ee Gobolka Gedo,sida Masuuliyiinta Maamulka ay Dalsan u sheegeen.
Qaar ka mid ah Bulshada Magaalada Balad Xaawo oo Dalsan la soo xiriiray ayaa waxa ay sheegeen in uu burburay kulan Maalin ka hor lagu qabtay Magaalada Mandheera kaas oo lagu xalinayay in dib loo furo Xadka Mandheera iyo Balad Xaawo oo todobaadtyadii la soo dhaafay xirnaa.
Horay ayaa Maamulka degmada Balad Xaawo iyo Shacabka waxa ay ka hortageen qorshooyin ay dowladda Kenya ku dhisi laheyd derbigaas,waxana taasi ay dhalisay in dagaal u dhexmaro Shacabka iyo Ciidamada Kenya.
Dowladda Kenya ayaa dhankeeda weli ku adkeysaneysa in darbigaas ay dhiseyso,iyada oo sheegtay in ay uga gol leedahay in ay ku ilaashato ammaanka dalkeeda,maadaama ay dagaal kula jirto Al-Shabaab.
