Wasiirka Boostada iyo Isgaarsiinta ee Xukuumada Soomaaliya Cabdi Canshuur ayaa faah faahino dheeraad ah ka bixiyay Sharciga Isgaarsiinta Qaranka oo uu dhawaan saxiixay Madaxweynaha Dowladda Federaalka Soomaaliya Maxamed C/laahi Maxamed (Farmaajo).
Wasiirka ayaa sheegay in sharcigan uu muhiim u yahay dalka islamarkaana wax badan uu ka saacidayo bulshada Soomaaliyeed.
Sidoo kale Cabdi Canshuur Wasiirka Boostada iyo Isgaarsiinta ee Xukuumada Soomaaliya waxa uu sheegay in dhaqaalo ahaan Sharcigan uu muhiim u yahay dhaqaalaha dalka.
Waxa uu xusay in lagama maarmaan ay tahay in dadka Soomaaliyeed ay helaan sharci Isgaarsiin oo u soo dhiciya xuquuqda ay ku leeyihiin Shirkadaha gaarka ee ka shaqeeya isgaarsiinta.
Wasiir Canshuur ayaa tilmaamay in sharcigan uu muhiim u yahay dhaqaalaha dalka iyo sidoo kale soo celintii hantidii Isgaarsiinta Qaranka.
“Sharcigan waa sharci muhiim u ah dalka, marka laga fiiriyo xag amni, xag dhaqaale iyo xag bulshaba waa u muhiim, Caalamka waxaan aheyn dalka keliya oo aan laheyn sharci isgaarsiin, shalay waxaan dib ugu soo laabanay caalamka casriga ah.” Ayuu yiri Wasiir Canshuur.
Sharciga Isgaarsiinta ayaa muddo fog hor-yaalay Baarlamaanka, iyadoo marxalado kala duwan soo maray, hase ahaatee Baarlamaanka 10-aad ayaa ku guuleystay inuu meel mariyo sharcigaan.
